ਸ਼ਾਮ ਚੁਰਾਸੀ -13-10-2024 (ਨਰਿੰਦਰ ਕਸ਼ਯਪ) – ਕਸ਼ਯਪ ਰਾਜਪੂਤ ਦੇ ਟਾਕ ਗੋਤਰ ਦੇ ਜਠੇਰਿਆਂ ਦਾ ਸਲਾਨਾ ਮੇਲਾ ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ 13 ਅਕਤੂਬਰ 2024 ਨੂੰ ਬੜੀ ਹੀ ਸ਼ਰਧਾ ਅਤੇ ਉਤਸ਼ਾਹ ਨਾਲ ਪ੍ਰਧਾਨ ਜਸਵਿੰਦਰ ਸਿੰਘ ਸੱਜਣਾ ਦੀ ਪ੍ਰਧਾਨਗੀ ਹੇਠ ਮਨਾਇਆ ਗਿਆ। ਟਾਕ ਗੋਤਰ ਦੇ ਵੱਡੇ ਵਡੇਰੇ ਬਾਬਾ ਬੀਰ ਮੱਲ ਟਾਕ ਜੀ ਦੇ ਅਸਥਾਨ ਪਿੰਡ ਜੰਡੀ, ਨੇੜੇ ਸ਼ਾਮ ਚੁਰਾਸੀ, ਜਿਲਾ ਹੁਸ਼ਿਆਰਪੁਰ ਵਿਖੇ ਇਹ ਸਲਾਨਾ ਮੇਲਾ ਪ੍ਰਬੰਧਕੀ ਕਮੇਟੀ ਟਾਕ ਜਠੇਰੇ ਵੱਲੋਂ ਕਰਵਾਇਆ ਗਿਆ। ਇਸ ਮੌਕੇ ਦੂਰ ਦੂਰ ਤੋਂ ਸੰਗਤ ਆਪਣੇ ਵੱਡੇ ਵਡੇਰਿਆਂ ਦਾ ਅਸ਼ੀਰਵਾਦ ਲੈਣ ਲਈ ਪੁੱਜੀ। ਸੰਗਤਾਂ ਸਵੇਰ ਤੋਂ ਹੀ ਆਪਣੇ ਜਠੇਰਿਆਂ ਦਾ ਅਸ਼ੀਰਵਾਦ ਲੈਣ ਲਈ ਪੁੱਜਣੀਆਂ ਸ਼ੁਰੂ ਹੋ ਗਈਆਂ ਸੀ। ਪ੍ਰਬੰਧਕੀ ਕਮੇਟੀ ਵੱਲੋਂ ਸੰਗਤਾਂ ਵਾਸਤੇ ਬਹੁਤ ਹੀ ਵਧੀਆ ਪ੍ਰਬੰਧ ਕੀਤਾ ਗਿਆ ਸੀ। ਆਉਣ ਵਾਲੀ ਸੰਗਤ ਲਈ ਸਵੇਰੇ ਗਰਮਾ-ਗਰਮ ਚਾਹ ਪਕੌੜਿਆਂ ਦਾ ਲੰਗਰ ਚੱਲਦਾ ਰਿਹਾ।
ਸੰਗਤ ਲਾਈਨਾਂ ਵਿਚ ਲੱਗ ਕੇ ਆਪਣੇ ਜਠੇਰਿਆਂ ਦੇ ਅਸਥਾਨ ਤੇ ਮੱਥਾ ਟੇਕ ਕੇ ਅਸ਼ੀਰਵਾਦ ਲੈ ਰਹੀ ਸੀ। ਪ੍ਰਬੰਧਕੀ ਕਮੇਟੀ ਅਤੇ ਸੰਗਤ ਨੇ ਮਿਲ ਕੇ ਸਵੇਰੇ ਦਰਬਾਰ ਵਿਚ ਝੰਡਾ ਚੜਾਇਆ। ਸੰਗਤਾਂ ਆਟੇ ਦੇ ਦੀਵੇ ਜਠੇਰਿਆਂ ਦੇ ਅਸਥਾਨ ਤੇ ਜਗਾ ਕੇ ਆਪਣੀ ਮਨੋਕਾਮਨਾ ਪੂਰੀ ਕਰਨ ਲਈ ਅਰਦਾਸਾਂ ਕਰ ਰਹੀਆਂ ਸੀ। ਕਮੇਟੀ ਵੱਲੋਂ ਆਈ ਹੋਈ ਸੰਗਤ ਦੀ ਗੱਡੀਆਂ ਦੀ ਪਾਰਕਿੰਗ, ਜੋੜੇ ਜਮਾ ਕਰਣ ਲਈ ਜੋੜਾ ਘਰ, ਮੱਥਾ ਟੇਕਣ ਲਈ ਵੀ ਲਾਈਨ ਲਗਾਉਣ ਦਾ ਬਹੁਤ ਵਧੀਆ ਪ੍ਰਬੰਧ ਕੀਤਾ ਗਿਆ ਸੀ। ਹਾਲ ਦੇ ਵਿਚ ਆਏ ਹੋਏ ਗਾਇਕ ਜਠੇਰਿਆਂ ਦਾ ਗੁਣਗਾਣ ਕਰ ਰਹੇ ਸੀ ਜਿੱਥੇ ਬਹੁਤ ਸਾਰੇ ਕਲਾਕਾਰਾਂ ਨੇ ਆਪਣੀ ਹਾਜਰੀ ਲਗਵਾਈ। ਬਾਹਰ ਲੰਗਰ ਖਾਣ ਅਤੇ ਵਰਤਾਉਣ ਦਾ ਪ੍ਰਬੰਧ ਵੀ ਬਹੁਤ ਹੀ ਵਧੀਆ ਢੰਗ ਨਾਲ ਕੀਤਾ ਗਿਆ ਸੀ। ਕੜੀ ਪਕੌੜੇ, ਦਾਲ, ਚਿੱਟੇ ਛੋਲੇ, ਕੜਾਹ ਪ੍ਰਸ਼ਾਦਿ, ਚਾਵਲ, ਰੁਮਾਲੀ ਰੋਟੀ ਅਤੇ ਜਲੇਬੀਆਂ ਦਾ ਲੰਗਰ ਸੰਗਤਾਂ ਨੂੰ ਵਰਤਾਇਆ ਗਿਆ। ਇਸ ਤੋਂ ਅਲਾਵਾ ਘਰ ਪ੍ਰਸ਼ਾਦਿ ਲੈ ਕੇ ਜਾਣ ਲਈ ਵੀ ਪੈਕ ਕਰਕੇ ਦਿੱਤਾ ਗਿਆ।