ਫਤਿਹਗੜ੍ਹ ਸਾਹਿਬ, 17-5-2026 (ਗੁਰਿੰਦਰ ਕਸ਼ਯਪ) – ਸਿੱਖ ਇਤਿਹਾਸ ਵਿਚ ਆਪਣੀ ਵਿਲੱਖਣ ਪਹਿਚਾਣ ਰੱਖਣ ਵਾਲੇ ਕਸ਼ਯਪ ਸਮਾਜ ਦੇ ਮਹਾਨ ਅਮਰ ਸ਼ਹੀਦ ਬਾਬਾ ਮੋਤੀ ਰਾਮ ਮਹਿਰਾ ਜੀ ਦੀ ਯਾਦ ਵਿਚ ਬਣਾਏ ਗਏ ਟਰੱਸਟ ਦੇ ਚੇਅਰਮੈਨ ਦੀ ਚੋਣ 17 ਮਈ 2026 ਨੂੰ ਹੋਈ, ਜਿਸ ਵਿਚ ਸ. ਸੁਖਦੇਵ ਸਿੰਘ ਰਾਜ ਨੇ ਸਾਬਕਾ ਚੇਅਰਮੈਨ ਨਿਰਮਲ ਸਿੰਘ ਐਸ.ਐਸ. ਨੂੰ 411 ਵੋਟਾਂ ਦੇ ਨਾਲ ਹਰਾ ਕੇ ਵੱਡੀ ਜਿੱਤ ਹਾਸਲ ਕੀਤੀ। ਅਮਰ ਸ਼ਹੀਦ ਬਾਬਾ ਮੋਤੀ ਰਾਮ ਮਹਿਰਾ ਮੈਮੋਰੀਅਲ ਚੈਰੀਟੇਬਲ ਟਰੱਸਟ ਸ਼੍ਰੀ ਫਤਿਹਗੜ੍ਹ ਸਾਹਿਬ ਦੇ ਚੇਅਰਮੈਨ ਦੀ ਚੋਣ ਲਈ ਮੁਕਾਬਲਾ ਸੁਖਦੇਵ ਸਿੰਘ ਰਾਜ ਅਤੇ ਨਿਰਮਲ ਸਿੰਘ ਐਸ.ਐਸ. ਵਿਚਕਾਰ ਸੀ। ਇਸ ਮੁਕਾਬਲੇ ਵਿਚ ਪੂਰਾ ਕਸ਼ਯਪ ਸਮਾਜ ਸੁਖਦੇਵ ਸਿੰਘ ਰਾਜ ਨਾਲ ਖੜਾ ਸੀ ਅਤੇ ਸਮਾਜ ਨੇ ਉਹਨਾਂ ਨੂੰ 411 ਵੋਟਾਂ ਨਾਲ ਜਿਤਾ ਕੇ ਸਮਾਜ ਸੇਵਾ ਦਾ ਮੌਕਾ ਦਿੱਤਾ।

ਚੋਣ ਕਮੇਟੀ ਦੇ ਮੈਂਬਰਾਂ ਕਨਵੀਨਰ ਸਰਵਣ ਸਿੰਘ ਬਿਹਾਲ, ਰਿਟਰਨਿੰਗ ਅਫਸਰ ਮਹਿੰਦਰ ਸਿੰਘ ਮੋਰਿੰਡਾ, ਠੇਕੇਦਾਰ ਰਣਜੀਤ ਸਿੰਘ, ਜਸਪਾਲ ਸਿੰਘ ਕਲੋਂਦੀ, ਬਲਬੀਰ ਸਿੰਘ ਬੱਬੂ, ਨਿਰਮਲ ਸਿੰਘ ਮੀਨੀਆਂ ਅਤੇ ਜਰਨੈਲ ਸਿੰਘ ਨੇ ਬੜੇ ਹੀ ਵਧੀਆ ਅਤੇ ਸ਼ਾਂਤਮਈ ਢੰਗ ਨਾਲ ਵੋਟਾਂ ਪਾਉਣ ਦਾ ਪ੍ਰਬੰਧ ਕੀਤਾ। ਟਰੱਸਟ ਦੇ ਵੋਟਰਾਂ ਵੱਲੋਂ ਟੋਟਲ 2087 ਵੋਟਾਂ ਪਾਈਆਂ ਗਈਆਂ, ਜਿਸ ਵਿਚੋਂ ਸੁਖਦੇਵ ਸਿੰਘ ਰਾਜ ਨੂੰ 1238 ਵੋਟਾਂ, ਨਿਰਮਲ ਸਿੰਘ ਐਸ.ਐਸ. ਨੂੰ 827 ਵੋਟਾਂ, ਸੁਖਦੇਵ ਸਿੰਘ ਰਾਜ ਦੇ ਹੱਕ ਵਿਚ ਆਏ ਗੁਰਚਰਨ ਸਿੰਘ ਧਨੋਲਾ ਨੂੰ 4 ਵੋਟਾਂ ਪਈਆਂ। 16 ਵੋਟਾਂ ਕੈਂਸਲ ਹੋ ਗਈਆਂ ਜਦਕਿ 2 ਵੋਟਾਂ ਨੋਟਾ ਨੂੰ ਪਈਆਂ। ਸ਼ਾਮ ਦੇ ਕਰੀਬ 7.30 ਵਜੇ ਵੋਟਾਂ ਦੀ ਗਿਣਤੀ ਪੂਰੀ ਹੋਣ ਤੋਂ ਬਾਅਦ ਚੋਣ ਕਮੇਟੀ ਦੇ ਇੰਚਾਰਜ ਮਹਿੰਦਰ ਸਿੰਘ ਮੋਰਿੰਡਾ ਨੇ ਸੁਖਦੇਵ ਸਿੰਘ ਰਾਜ ਦੀ ਜਿੱਤ ਦਾ ਐਲਾਨ ਕੀਤਾ ਅਤੇ ਟੋਟਲ ਵੋਟਾਂ ਦੀ ਜਾਣਕਾਰੀ ਦਿੱਤੀ। ਨਵਾਂ ਚੇਅਰਮੈਨ ਚੁਣੇ ਜਾਣ ਤੋਂ ਬਾਅਦ ਸੁਖਦੇਵ ਸਿੰਘ ਰਾਜ ਨੇ ਗੁਰਦੁਆਰਾ ਸਾਹਿਬ ਵਿਖੇ ਮੱਥਾ ਟੇਕ ਕੇ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਅਤੇ ਬਾਬਾ ਮੋਤੀ ਰਾਮ ਮਹਿਰਾ ਦਾ ਅਸ਼ੀਰਵਾਦ ਲੈ ਕੇ ਸੰਗਤਾਂ ਦਾ ਧੰਨਵਾਦ ਕੀਤਾ। ਉਹਨਾਂ ਕਿਹਾ ਕਿ ਟਰੱਸਟ ਦੇ ਮੈਂਬਰ, ਕਸ਼ਯਪ ਸਮਾਜ ਦੀਆਂ ਸਭਾਵਾਂ ਅਤੇ ਵੋਟਰਾਂ ਨੇ ਜਿਹੜਾ ਭਰੋਸਾ ਦਿਖਾਇਆ ਹੈ ਉਹ ਉਸ ਉਪਰ ਪੂਰਾ ਉਤਰਨ ਦੀ ਕੋਸ਼ਿਸ਼ ਕਰਨਗੇ ਅਤੇ ਸਾਰੇ ਸਮਾਜ ਦੇ ਸਹਿਯੋਗ ਨਾਲ ਇਸ ਟਰੱਸਟ ਨੂੰ ਚਲਾਉਣਗੇ। ਪਿਛਲੇ ਸਮੇਂ ਵਿਚ ਜੋ ਵੀ ਕਮੀਆਂ ਰਹਿ ਗਈਆਂ ਸਨ ਉਹਨਾਂ ਨੂੰ ਸਾਰੇ ਸਾਥੀਆਂ ਦੇ ਸਹਿਯੋਗ ਨਾਲ ਦੂਰ ਕਰਕੇ ਟਰੱਸਟ ਅਤੇ ਸਮਾਜ ਦੀ ਬਿਹਤਰੀ ਲਈ ਕੰਮ ਕਰਨਗੇ। 

17-5-2026 ਨੂੰ ਸਵੇਰੇ 8 ਵਜੇ ਤੋਂ ਸ਼ਾਮ 4 ਵਜੇ ਤੱਕ ਵੋਟਾਂ ਪਾਉਣ ਦਾ ਸਮਾਂ ਤੈਅ ਸੀ, ਜਿਸਦੇ ਲਈ ਟਰੱਸਟ ਦੇ ਵੋਟਰ ਸਵੇਰੇ ਤੋਂ ਹੀ ਪੁਹੰਚਣਾ ਸ਼ੁਰੂ ਹੋ ਗਏ। ਦੁਪਹਿਰ 12 ਵਜੇ ਦੇ ਕਰੀਬ ਪੂਰੇ ਪੰਜਾਬ ਦੇ ਵੱਖ ਵੱਖ ਇਲਾਕਿਆਂ ਅੰਮ੍ਰਿਤਸਰ, ਗੁਰਦਾਸਪੁਰ, ਬਟਾਲਾ, ਪਠਾਨਕੋਟ, ਮੁਕੇਰੀਆਂ, ਜਲੰਧਰ, ਤਰਨ-ਤਾਰਨ, ਮੋਗਾ, ਫਿਰੋਜਪੁਰ, ਬਰਨਾਲਾ, ਸੰਗਰੂਰ, ਪਾਤੜਾਂ, ਮਾਨਸਾ, ਪਟਿਆਲਾ, ਚੰਡੀਗੜ, ਹਰਿਆਣਾ, ਰਾਜਸਥਾਨ, ਦਿੱਲੀ ਤੋਂ ਟਰੱਸਟ ਦੇ ਵੋਟਰ ਪਹੁੰਚ ਗਏ ਅਤੇ ਵੋਟਾਂ ਪਾਉਣ ਲਈ ਲੰਮੀਆਂ ਲਾਈਨਾਂ ਲੱਗ ਗਈਆਂ। ਸਾਰੇ ਮੈਂਬਰਾਂ ਨੇ ਆਪਣੀ ਵਾਰੀ ਦਾ ਇੰਤਜਾਰ ਕਰਕੇ ਵੋਟਾਂ ਪਾਈਆਂ। ਇਸ ਦੌਰਾਨ ਸਵੇਰੇ ਬ੍ਰੈਡ ਪਕੌੜੇ, ਚਾਹ, ਠੰਡਾ ਪਾਣੀ, ਠੰਡੇ ਜਲ ਦੀ ਛਬੀਲ ਅਤੇ ਗੁਰੂ ਦੇ ਲੰਗਰ ਦਾ ਪ੍ਰਬੰਧ ਕੀਤਾ ਗਿਆ ਸੀ ਤਾਂ ਜੋ ਸੰਗਤਾਂ ਨੂੰ ਕੋਈ ਪਰੇਸ਼ਾਨੀ ਨਾ ਹੋਵੇ।