ਫਤਿਹਗੜ ਸਾਹਿਬ, 26-4-2026 (ਕ.ਕ.ਪ.) – ਅਮਰ ਸ਼ਹੀਦ ਬਾਬਾ ਮੋਤੀ ਮੈਮੋਰੀਅਲ ਚੈਰੀਟੇਬਲ ਟਰੱਸਟ ਸ਼੍ਰੀ ਫਤਿਹਗੜ ਸਾਹਿਬ ਦੇ ਚੇਅਰਮੈਨ ਦੇ ਅਹੁਦੇ ਲਈ 17 ਮਈ ਨੂੰ ਵੋਟਾਂ ਹੋਣਗੀਆਂ। ਇਹਨਾਂ ਚੋਣਾਂ ਲਈ ਹੁਣ ਤਿੰਨ ਉਮੀਦਵਾਰ ਮੈਦਾਨ ਵਿਚ ਰਹਿ ਗਏ ਹਨ ਜਿਹਨਾਂ ਵਿਚ ਟਰੱਸਟ ਦੇ ਸਾਬਕਾ ਚੇਅਰਮੈਨ ਨਿਰਮਲ ਸਿੰਘ ਐਸ.ਐਸ., ਸਾਬਕਾ ਸੀ. ਵਾਈਸ ਚੇਅਰਮੈਨ ਸੁਖਦੇਵ ਸਿੰਘ ਰਾਜ ਅਤੇ ਵਾਈਸ ਚੇਅਰਮੈਨ ਗੁਰਚਰਨ ਸਿੰਘ ਧਨੋਲਾ ਸ਼ਾਮਲ ਹਨ। ਅੱਜ ਕਾਗਜ ਵਾਪਸ ਲੈਣ ਲਈ ਚੋਣ ਨਿਸ਼ਾਨ ਜਾਰੀ ਕਰਨ ਦੀ ਆਖਰੀ ਤਰੀਕ ਸੀ। ਅੱਜ ਚੰਡੀਗੜ ਤੋਂ ਕੁਲਵੰਤ ਸਿੰਘ ਮੁੱਲੇ, ਗੁਰਦਾਸਪੁਰ ਤੋਂ ਮਨਮੋਹਨ ਸਿੰਘ ਭਾਗੋਵਾਲੀਆ, ਰਾਜ ਕੁਮਾਰ ਪਾਤੜਾਂ ਨੇ ਆਪਣੇ ਕਾਗਜ ਵਾਪਸ ਲੈ ਲਏ ਅਤੇ ਸੁਖਦੇਵ ਸਿੰਘ ਰਾਜ ਨੂੰ ਸਮਰਥਨ ਦਾ ਐਲਾਨ ਕੀਤਾ। ਇਸ ਤੋਂ ਪਹਿਲਾਂ ਤਰਵਿੰਦਰ ਸਿੰਘ ਲੁਧਿਆਣਾ ਦੇ ਕਾਗਜ ਸਹੀ ਨਾ ਹੋਣ ਕਾਰਣ ਰੱਦ ਕਰ ਦਿੱਤੇ ਗਏ ਸੀ। ਚੋਣ ਕਮੇਟੀ ਦੇ ਮੈਂਬਰ ਸ. ਸਰਵਣ ਸਿੰਘ ਬਿਹਾਲ, ਮੋਹਿੰਦਰ ਸਿੰਘ ਮੋਰਿੰਡਾ, ਠੇਕੇਦਾਰ ਰਣਜੀਤ ਸਿੰਘ, ਜਸਪਾਲ ਸਿੰਘ ਕਲੋਂਦੀ, ਜਰਨੈਲ ਸਿੰਘ ਹੱਸਨਪੁਰ, ਬਲਬੀਰ ਸਿੰਘ ਬੱਬੂ, ਨਿਰਮਲ ਸਿੰਘ ਮੀਨੀਆ ਅਤੇ ਗੁਰਚਰਨ ਸਿੰਘ ਹਲਵਾਰਾ ਨੇ ਸਾਰੇ ਉਮੀਦਵਾਰਾਂ ਨੇ ਕਾਗਜ ਚੈਕ ਕੀਤੇ ਸੀ।

ਚੋਣ ਕਮੇਟੀ ਵੱਲੋਂ ਸੁਖਦੇਵ ਸਿੰਘ ਰਾਜ ਨੂੰ ਬੱਸ, ਨਿਰਮਲ ਸਿੰਘ ਐਸ.ਐਸ. ਨੂੰ ਬਾਲਟੀ ਅਤੇ ਗੁਰਚਰਨ ਸਿੰਘ ਧਨੋਲਾ ਨੂੰ ਪੌੜੀ ਚੋਣ ਨਿਸ਼ਾਨ ਦਿੱਤਾ ਗਿਆ। ਅੱਜ ਟਰੱਸਟ ਵਿਚ ਮੌਜੂਦ ਸਮਾਜ ਦੇ ਪਤਵੰਤੇ ਸੱਜਣਾਂ ਅਤੇ ਪੁਰਾਣੀ ਕਮੇਟੀ ਦੇ ਮੈਂਬਰਾਂ ਨੇ ਇਹਨਾਂ ਉਮੀਦਵਾਰਾਂ ਵਿਚ ਸਰਬਸੰਮਤੀ ਕਰਵਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਉਹ ਸਫਲ ਨਹੀਂ ਹੋ ਸਕੇ ਅਤੇ ਚੋਣਾਂ ਹੀ ਲੜਨ ਦਾ ਫੈਸਲਾ ਕੀਤਾ ਗਿਆ। ਹੁਣ 17 ਮਈ ਨੂੰ ਟਰੱਸਟ ਦੇ ਚੇਅਰਮੈਨ ਦੀ ਚੋਣ ਲਈ ਸਵੇਰੇ 8 ਵਜੇ ਤੋਂ ਸ਼ਾਮ 4 ਵਜੇ ਤੱਕ ਵੋਟਾਂ ਹੋਣਗੀਆਂ ਅਤੇ ਉਸੇ ਦਿਨ ਸ਼ਾਮ ਨੂੰ ਨਤੀਜਾ ਵੀ ਆ ਜਾਏਗਾ।