ਪੰਜਾਬ ਦੇ ਕਸ਼ਯਪ ਸਮਾਜ ਵਿਚ ਅਮਰ ਸ਼ਹੀਦ ਬਾਬਾ ਮੋਤੀ ਰਾਮ ਮਹਿਰਾ ਜੀ ਦੀ ਫਤਿਹਗੜ੍ਹ ਸਾਹਿਬ ਵਿਖੇ ਬਣੀ ਯਾਦਗਾਰ ਨੂੰ ਸਮਾਜ ਦਾ ਧੁਰਾ ਜਾਂ ਮੱਕਾ ਮੰਨਿਆ ਜਾਂਦਾ ਹੈ। ਇਥੋਂ ਦਾ ਪ੍ਰਬੰਧ ਚਲਾਉਣ ਲਈ ਚੇਅਰਮੈਨ ਅਤੇ ਉਸਦੇ ਨਾਲ ਕਮੇਟੀ ਦਾ ਗਠਨ ਕੀਤਾ ਜਾਂਦਾ ਹੈ। ਪਹਿਲਾਂ ਤਾਂ ਚੇਅਰਮੈਨ ਦੀ ਚੋਣ ਸਰਬਸੰਮਤੀ ਨਾਲ ਕਰ ਲਈ ਜਾਂਦੀ ਸੀ ਅਤੇ ਉਹ ਸਮਾਜ ਨੂੰ ਨਾਲ ਲੈ ਕੇ ਟਰੱਸਟ ਦੀ ਭਲਾਈ ਵਾਸਤੇ ਕੰਮ ਕਰਦੇ ਸੀ। ਪਰ ਸੰਨ 2010 ਤੋਂ ਵੋਟਾਂ ਰਾਹੀਂ ਚੇਅਰਮੈਨ ਦੀ ਚੋਣ ਕਰਨ ਦੀ ਪਰੰਪਰਾ ਚੱਲ ਪਈ ਹੈ। ਪਹਿਲਾਂ ਤਾਂ ਯਾਦਗਾਰ ਨੂੰ ਬਨਾਉਣ ਦਾ ਹੀ ਕੰਮ ਚੱਲ ਰਿਹਾ ਸੀ ਅਤੇ ਟਰੱਸਟ ਵਿਚ ਬਹੁਤ ਜਿਆਦਾ ਆਮਦਨੀ ਨਹੀਂ ਹੁੰਦੀ ਸੀ। ਇਸ ਕਰਕੇ ਸਿਰਫ ਸਮਾਜ ਸੇਵਾ ਕਰਨ ਵਾਲੇ ਸਮਾਜ ਦੇ ਮੋਹਰੀ ਸੱਜਣ ਹੀ ਸਰਬਸੰਮਤੀ ਨਾਲ ਚੇਅਰਮੈਨ ਚੁਣੇ ਜਾਂਦੇ ਸੀ ਅਤੇ ਉਹ ਸੱਚੇ ਦਿਲ ਨਾਲ ਟਰੱਸਟ ਦੀ ਸੇਵਾ ਕਰਦੇ ਸਨ। ਹੁਣ ਟਰੱਸਟ ਵਿਚ ਆਮਦਨੀ ਜਿਆਦਾ ਹੋ ਗਈ ਅਤੇ ਚੇਅਰਮੈਨੀ ਦੇ ਦਾਅਵੇਦਾਰ ਵੀ ਵਧ ਗਏ ਹਨ। ਹੁਣ ਚੇਅਰਮੈਨ ਦਾ ਅਹੁਦਾ ਸਿਰਫ ਸੇਵਾ ਕਰਨ ਲਈ ਨਹੀਂ ਰਹਿ ਗਿਆ ਸਗੋਂ ਸਮਾਜ ਅਤੇ ਰਾਜਨੀਤਿਕ ਪਾਰਟੀਆਂ ਤੱਕ ਆਪਣੀ ਪਹੁੰਚ ਕਰਨ ਦਾ ਸਾਧਨ ਬਣ ਗਿਆ ਹੈ।
ਸੰਨ 2010 ਵਿਚ ਠੇਕੇਦਾਰ ਮੰਗਤ ਸਿੰਘ ਮੋਰਿੰਡਾ ਨਿਰਮਲ ਸਿੰਘ ਐਸ.ਐਸ. ਵਿਰੁੱਧ 7 ਵੋਟਾਂ ਨਾਲ ਜਿੱਤ ਹਾਸਲ ਕਰਕੇ ਚੇਅਰਮੈਨ ਬਣਿਆ ਅਤੇ ਤਿੰਨ ਸਾਲਾਂ ਵਿਚ ਆਪਣੀ ਮਨਮਰਜੀ ਕਰਦੇ ਹੋਏ ਟਰੱਸਟ ਅਤੇ ਸਮਾਜ ਦਾ ਬਹੁਤ ਵੱਡਾ ਨੁਕਸਾਨ ਕੀਤਾ। ਇਸ ਤੋਂ ਬਾਅਦ 31 ਮੈਂਬਰੀ ਕਮੇਟੀ ਬਣੀ ਅਤੇ ਟਰੱਸਟ ਨੂੰ ਪੁਰਾਣੇ ਚੇਅਰਮੈਨ ਪ੍ਰਸ਼ੋਤਮ ਸਿੰਘ ਦੀ ਅਗਵਾਈ ਹੇਠ ਮੁੜ ਪੈਰਾਂ ਤੇ ਖੜਾ ਕੀਤਾ। ਫਿਰ ਸੰਨ 2018 ਵਿਚ ਹੋਈਆਂ ਚੋਣਾਂ ਵਿਚ ਨਿਰਮਲ ਸਿੰਘ ਐਸ.ਐਸ. ਨੇ ਚੇਅਰਮੈਨ ਦੀ ਚੋਣ ਜਿੱਤੀ। ਇਹਨਾਂ ਚੋਣਾਂ ਵਿਚ ਪਹਿਲੀ ਵਾਰ ਸਾਰੇ ਉਮੀਦਵਾਰਾਂ ਨੇ ਆਪਣੇ ਚੋਣ ਮੈਨੀਫੈਸਟੋ (ਘੋਸ਼ਣਾ ਪੱਤਰ ) ਜਾਰੀ ਕੀਤੇ ਕਿ ਜੇਕਰ ਉਹ ਚੇਅਰਮੈਨ ਬਣਦੇ ਹਨ ਤਾਂ ਇਹ ਕੰਮ ਕਰਨਗੇ। ਚੇਅਰਮੈਨ ਦੀ ਚੋਣ ਹੁੰਦੀ ਤਾਂ ਦੋ ਸਾਲਾਂ ਲਈ ਹੈ ਪਰ 2020 ਵਿਚ ਕੋਰੋਨਾ ਦੀ ਬਿਮਾਰੀ ਆਉਣ ਕਾਰਣ ਇਸਦਾ ਸਮਾਂ ਇਕ ਸਾਲ ਲਈ ਵਧਾਇਆ ਗਿਆ। ਦੋਬਾਰਾ 2021 ਵਿਚ ਕੋਰੋਨਾ ਦੀ ਆੜ ਵਿਚ ਹੀ ਇਕ ਸਾਲ ਦਾ ਸਮਾਂ ਹੋਰ ਵਧਾ ਲਿਆ ਗਿਆ। 2022 ਵਿਚ ਜਨਰਲ ਇਜਲਾਸ ਦੌਰਾਨ ਟਰੱਸਟ ਦੇ ਅਕਾਉਂਟ ਨੂੰ ਲੈਕੇ ਹੰਗਾਮਾ ਹੋਣ ਕਾਰਣ ਇਕ ਸਾਲ ਤੱਕ ਚੋਣ ਨਹੀਂ ਹੋ ਸਕੀ। ਇਸ ਦੌਰਾਨ ਨਿਰਮਲ ਸਿੰਘ ਐਸ.ਐਸ. ਨੂੰ ਚੇਅਰਮੈਨ ਵਜੋਂ ਕੰਮ ਕਰਨ ਲਈ ਪੰਜ ਸਾਲਾਂ ਦਾ ਸਮਾਂ ਮਿਲ ਗਿਆ। 2023 ਵਿਚ ਇਕ ਵਾਰ ਫਿਰ ਨਿਰਮਲ ਸਿੰਘ ਐਸ.ਐਸ. ਭਾਰੀ ਗਿਣਤੀ ਵਿਚ ਵੋਟਾਂ ਲੈ ਕੇ ਆਪਣੇ ਅਤੇ ਸਮਾਜ ਵਿਰੋਧੀਆਂ ਨੂੰ ਹਰਾ ਕੇ ਚੇਅਰਮੈਨ ਦੀ ਚੋਣ ਜਿੱਤੇ। ਹੁਣ ਚੇਅਰਮੈਨ ਦੀ ਚੋਣ ਹੋਏ ਨੂੰ 2 ਸਾਲ ਦਾ ਸਮਾਂ ਪੂਰਾ ਹੋ ਚੁੱਕਾ ਹੈ ਅਤੇ ਜੂਨ ਮਹੀਨੇ ਚੇਅਰਮੈਨ ਦੀ ਚੋਣ ਹੋਣੀ ਸੀ। ਪਰ ਮੌਜੂਦਾ ਕਮੇਟੀ ਅਤੇ ਚੇਅਰਮੈਨ ਨੇ ਚੋਣਾਂ ਦਾ ਸਮਾਂ ਅੱਗੇ ਵਧਾਉਣ ਲਈ ਕਿਹਾ ਹੈ।
ਸਮਾਜ ਨੂੰ ਸਮਝ ਨਹੀਂ ਆ ਰਹੀ ਕਿ ਚੇਅਰਮੈਨ ਨੂੰ ਕੁਰਸੀ ਸੰਭਾਲੇ ਹੋਏ 7 ਸਾਲ ਦਾ ਸਮਾਂ ਹੋ ਗਿਆ ਹੈ ਪਰ ਫਿਰ ਵੀ ਉਹ ਸਮੇਂ ਸਿਰ ਚੋਣਾਂ ਕਿਉਂ ਨਹੀਂ ਕਰਵਾ ਰਹੇ? ਕਿਉਂ ਟਰੱਸਟ ਦੀ ਕਮੇਟੀ ਵੱਲੋਂ ਆਪਣੀ ਮਨਮਰਜੀ ਨਾਲ ਕੰਮ ਕੀਤਾ ਜਾ ਰਿਹਾ ਹੈ? ਐਸੀ ਕਿਹੜੀ ਮਜਬੂਰੀ ਹੈ ਜਿਸ ਕਾਰਣ ਚੇਅਰਮੈਨ ਦੀਆਂ ਚੋਣਾਂ ਨੂੰ ਅੱਗੇ ਵਧਾਇਆ ਜਾ ਰਿਹਾ ਹੈ?ਜਿੱਥੇ ਤੱਕ ਵੋਟਾਂ ਦਾ ਸਵਾਲ ਹੈ ਸ਼ਾਇਦ ਸਮਾਜ ਇਕ ਵਾਰ ਫਿਰ ਨਿਰਮਲ ਸਿੰਘ ਐਸ.ਐਸ. ਨੂੰ ਹੀ ਚੇਅਰਮੈਨ ਦਾ ਅਹੁਦਾ ਦੇ ਦੇਵੇ ਪਰ ਚੋਣ ਤਾਂ ਸਮੇਂ ਸਿਰ ਹੋਣੀ ਚਾਹੀਦੀ ਹੈ। ਸਮਾਜ ਇਹ ਚਾਹੁੰਦਾ ਹੈ ਕਿ ਟਰੱਸਟ ਦੀ ਕਮੇਟੀ ਵਿਚ ਸਿਰਫ ਚੇਅਰਮੈਨ ਦੀ ਹੀ ਚੋਣ ਨਾ ਹੋਵੇ ਸਗੋਂ ਹਰੇਕ ਅਹੁਦੇਦਾਰ ਦੀ ਚੋਣ ਕੀਤੀ ਜਾਵੇ ਤਾਂ ਜੋ ਕਿਸੇ ਇਕ ਦੀ ਚੌਧਰ ਨਾ ਚੱਲ ਸਕੇ। ਸਮਾਜ ਇਹ ਵੀ ਚਾਹੁੰਦਾ ਹੈ ਕਿ ਚੇਅਰਮੈਨ ਦੀ ਚੋਣ ਸਰਬਸੰਮਤੀ ਨਾਲ ਹੋ ਜਾਵੇ ਤਾਂ ਜੋ ਸਮਾਜ ਅਤੇ ਟਰੱਸਟ ਦਾ ਜਿਹੜਾ ਪੈਸਾ ਚੋਣਾਂ ਵਿਚ ਖਰਚ ਹੁੰਦਾ ਹੈ ਉਸ ਤੋਂ ਬਚਿਆ ਜਾ ਸਕੇ।

ਨਰਿੰਦਰ ਕਸ਼ਯਪ
ਮੁੱਖ ਸੰਪਾਦਕ – ਕਸ਼ਯਪ ਕ੍ਰਾਂਤੀ ਪੱਤ੍ਰਿਕਾ